لوګر کې پر امریکايي ځواکونو موټربم برید شوی

پل علم (پژواک، ٢١ لړم ٩٨): د لوګر په مرکز پل علم کې د امريکايي ځواکونو د موټرو پر کاروان موټربم بريد شوى خو د مرګ ژوبلې په اړه يې تر اوسه معلومات نشته.

د لوګر د مرکز پل علم د پادخاب شانې سيمې اوسېدونکي عبيدالله پژواک ته وويل چې نن له غرمې مخکې شاوخوا ١١ نيمې بجې د دوى په سيمه کې د امريکايي ځواکونو کمپ ته نږدې د موټربم بريد وشو.

هغه وايي: ((ډېره درنه چاودنه وه، نږدې کورونه يې هم ولړزول.))

په دې اړه د لوګر د والي وياند ديدار لونګ پژواک ته وويل چې د امريکايي ځواکونو کمپ ته نږدې چاودنه شوې ده.

هغه زياته کړه: ((د مرګ ژوبلې په اړه يې معلومات نه لرو او دا هم معلومه نه ده چې موټربم و او که د کوم بل شي بريد و.))

امريکايي ځواکونه هم دغه بريد تاييدوي.

په کابل کې د امريکايي ځواکونو وياند پژواک ته وويل چې نن له غرمې مخکې د لوګر په مرکز پل علم کې د دوى د موټرو پر کاروان موټربم بريد شوى دى.

هغه وايي چې په دغه بريد کې هېچا ته مرګ ژوبله نه ده اوښتې او يواځې بريدګر له منځه تللى دى.

وسله والو طالبانو تر اوسه په دې اړه څه نه دي ويلي.