د لوګر د استيناف څارنوالۍ لپاره نوې ودانۍ جوړېږي

پل علم (پژواک، ٢ مرغومى ٩٨): د لوګر چارواکي وايي چې د ٢٨ ميليونه افغانيو په لګښت په مرکز پل علم کې د دغه ولايت د استيناف څارنوالۍ لپاره نوې ودانۍ جوړېږي.

د لوګر د والي وياند ديدار لونګ د مرغومي په دويمه پژواک خبري اژانس ته وويل چې دغه ودانۍ په ٣٣٠٠ متره مربع ځمکه کې د يوه کال په موده کې جوړېږي.

ده وويل چې پر دغې ودانۍ ٢٨ ميليونه افغانۍ لګول کيږي چې لګښت يې د حکومت له پراختيايي بوديجې څخه ورکول کيږي.

د نوموړي د معلوماتو له مخې، دغه ودانۍ په درېيو پوړونو کې جوړېږي چې ٢٠ اداري خونې او نور ملحقات به ولري.

په ورته وخت کې د لوګر د استيناف څارنوالۍ رييس محمد عمر دوست پژواک ته وويل، دا لومړى ځل دى چې په دغه ولايت کې د استيناف څارنوالۍ لپاره خپله ودانۍ جوړېږي.

ده وويل: ((موږ تر اوسه پورې د دفتري چارو د ترسره کولو لپاره خپله ودانۍ نه لرو چې هم موږ او هم مراجعين په مشکلاتو کې دي.))

نوموړي هيله وښوده چې د يادې ودانۍ په جوړېدو سره به د دوى دغه ستونزې هوارې شي.

د يادونې ده چې دا مهال په لوګر ولايت د ٦٦٦ ميليونه افغانيو په لګښت د ١٤٨ لويو او کوچينو پروژو د جوړېدو چارې روانې دي.