امنیتي ځواکونو د پکتیکا په ګومل کې د طالبانو وسلې او مهمات ترلاسه کړي

ښرنه (پژواک، ٩ مرغومى ٩٨): د پکتيکا امنيتي چارواکي وايي چې په ګومل ولسوالۍ کې يې د وسله والو طالبانو د وسلو او ځانمرګو د واسکټونو يوه زېرمه کشف او ترلاسه کړې ده.

په دې اړه د پکتيکا امنيه قوماندان سمونوال نثار احمد عبدالرحيمزي د مرغومي په نهمه پژواک خبري اژانس ته وويل چې تېره شپه افغان ځواکونو د ګومل ولسوالۍ په ملايانو کلي کې د وسله والو طالبانو د وسلو پر يوې زېرمې عمليات کړي دي.

هغه وايي چې له دې زېرمې ٣٠ لوى ماينونه، شپږ لاسي بمونه، د ځانمرګو واسکټونه او يو شمېر نور چاودېدونکي توکي ترلاسه شوي دي.

دغه راز د پکتيکا مرستيال والي شېر بادشاه اورګوني وويل چې پوليسو په دې وروستيو کې په مرکز ښرنه او ولسواليو کي بېلابېل ګټور عمليات ترسره کړي دي.

ده زياته کړه: ((موږ به له نورو امنيتي ارګانونو سره په همغږۍ د دغه ولايت په نورو سيمو کې هم عمليات پلان کړو څو سيمې د وسله والو طالبانو له ګواښونو وژغورل شي.))

بل لور ته وسله والو طالبانو تر اوسه په دې اړه څه نه دي ويلي.

د يادونې ده، تېره ورځ هم پوليسو د پکتيکا په خوشامند ولسوالۍ کې د عمليانو پر مهال اته ټنه چرس له کشف او ترلاسه کولو وروسته سوځولي وو.