د سمنګان د دره صوف پایین پر ولسوالۍ د طالبانو برید پر شا وتمبول شو

ایبک (پژواک، ۱۳ مرغومی ۹۸): د سمنګان پولیس وايي چې د دغه ولایت د دره صوف پایین پر مرکز د طالبانو ډله ییز برید پر شا وتمبول شو او د دې ډلې یو شمېر کسانو ته مرګ ژوبله اوښتې ده.

د سمنګان امنیې قوماندانۍ ویاند منیر رحیمي پژواک خبري اژانس ته وویل چې تېره شپه یوولس بجې تر ۳۰۰ ډېرو طالبانو د دره صوف پایین ولسوالۍ د مرکز پر امنیتي پوستو برید وکړ.

هغه د دې په ویلو سره، د طالبانو او امنیتي ځواکونو ترمنځ له څو ساعته نښتې وروسته، د شپې درې نیمې بجې د طالبانو برید پر شا وتمبول شو چې له امله یې د یوه سرګروپ ملا شېرمحمد په ګډون پنځه طالبان ووژل شول او اووه نور ټپیان شول.

د سیمې یوه اوسېدونکي چې نه یې غوښتل نوم یې واخیستل شي، د طالبانو یاد ډله ییز برید تایید کړ خو ویې ویل چې په دې جګړه کې یو طالب او شپږ امنیتي سرتېري ټپیان شوي دي.

دا په داسې حال کې ده چې له یوې اوونۍ را په دېخوا امنیتي ارګانونو د دره صوف- مزارشریف لارې او سیمې پاکولو په موخه عملیات پیل کړي خو تر اوسه هیڅ سیمه له طالبانو نه ده پاکه شوې.

خو طالبانو په دې اړه تر اوسه څه نه دي ویلي.