لوګر کې پر لس زره کورنيو د خوراکي توکو د وېش لړۍ پيل شوه

 پل علم (پژواک، ١٩ مرغومى ٩٨): په لوګر ولايت کې له لس زره بې ځايه شويو، بيوزلو او سيلاب ځپلو کورنيو سره د خوراکي توکو د مرستو لړۍ پيل شوه.

د اړوندې موضوع په اړه جوړو شويو مراسمو ته د لوګر د طبيعي پېښو پر وړاندې د مبارزې رييس مطيع الله احمدزي وويل چې د يوې سروې له مخې په دغه ولايت کې د مرستو لپاره لس زره هغه کورنۍ په نښه شوي چې د جګړو له امله بې ځايه شوي، بيوزله دي او يا هم سيلابونو ځپلې دي.

هغه وايي: ((د خوراک نړيوال سازمان له لوري موږ ته غنم، وريجې، غوړي او يوه اندازه نور خوراکي توکي راکړل شوي چې پر دې کورنيو يې و وېشو او نن مو دغه لړۍ پيل کړه.))

د نوموړي د معلوماتو له مخې، دغه خوراکي توکي د مرکز پل علم ترڅنګ په ټولو ولسواليو کې پر سروې شويو کسانو وېشل کيږي.

يوتن مرسته اخيستوونکي او د مرکز پل علم د نيازيو کلي اوسېدونکي احمد ضيا پژواک ته وويل چې سيلابونو سخت ځپلى دى.

هغه وايي: ((په پسرلي کې زما دوه جريبه فصل اوبو لاندې کړ، حکومت اوس راته دوه بورۍ غنم او وريجې راکړې، زه په دې څه وکړم دا خو ډېر کم دي.))

دغه راز د بره کي برک ولسوالۍ د پنجدې سيمې اوسېدونکي جميل پژواک ته وويل چې د حکومت له مرستو ډېر خوښ دى.

هغه وويل: ((په کور کې هېڅ هم نه لرو، د الله پاک شکر دى چې حکومت راسره کومک وکړ.))

د يادونې ده چې تر دې وړاندې د لوګر د کډوالو چارو رياست له لوري هم پر يو شمېر مستحقو کورنيو مرستې و وېشل شوې.