په کندهار کې څلورو امريکايانو ته مرګ ژوبله واوښته

کابل (پژواک ٢١ مرغومى ٩٨): د ناټو ځواکونه وايي چې په کندهارولايت کې د دوى څلورو تنو ته مرګ ژوبله اوښتې ده.

د ناټو ځواکونو د غوڅ ملاتړ له دفتر څخه پژواک خبري اژانس ته په رالېږل شوې خبرپاڼه کې راغلي چې د دوى ځواکونه په کندهار ولايت کې په پوځي عملياتو بوخت وو چې پر موټر يې د سړک غاړې ماين چاودنه شوې ده.

سرچينه زياتوي، په دې پېښه کې دوه امريکايان وژل شوي او دوه نور ژوبل شوي دي.

د (تلفاتو) په نوم د يوې ويب پاڼې (http://icasualties.org/) چې په عراق او افغانستان کې د امريکا او متحدينو د تلفاتو په اړه معلومات خپروي، د معلوماتو په حواله، د ٢٠١٩ کال له پيل راهيسې د دې ځواکونو ٢٦ پوځيان چې ٢٤ يې امريکايان دي، وژل شوي دي.