پلخمري (پژواک، ١٩سلواغه ٩٨): د بغلان ولايت ديني عالمانو، مدني فعالانو او سلګونو اوسېدونکو د يوې غونډې په ترڅ کې په هېواد کې د سراسري اوربند غوښتنه وکړه.
دغه غونډه د سلواغې په ١٩مه د بغلان ولايت په مرکز پلخمري ښار کې جوړه شوې وه.
په غونډه کې ديني عالم مولوي عبدالنصير حميدي وويل چې د هېواد د ښې راتلونکې په موخه ټول بايد سره يوځاى شي.
هغه وايي: ((پخوا به مو دعا کوله چې يو تنظيم واک ته ورسېږي، خو د ټولو مزه مو وليده، زموږ او ستاسو ښېګڼه زموږ او ستاسو په يووالي کې ده.))
ده وويل چې حکومت او طالبان بايد نور جګړه پرېږدي او د سولې لپاره هلې ځلې وکړي.
دغه راز يو بل ديني عالم محمد رسول نعماني وويل چې له افغانستانه بهر د افغان سولې په تړاو خبرې پايلې ته نه رسېږي.
نوموړي زياته کړه: ((موږ بايد کوڅه په کوڅه د سولې لپاره غږ پورته کړو، څو هېواد ته مو تلپاتې سوله راشي.))
همدارنګه په دې غونډه کې د بغلان د ښځو چارو رييسې خديجه يقين وويل چې روانه جګړه پر افغانانو تپل شوې او د حل يوه لار ورته په کار ده.
دې زياته کړه: ((هېڅکله يوه مور نه غواړي چې زوى يې قاتل شي او يا هم مړ شي خو روانې جګړې ډېرې ميندې بورې کړې.))
د يادې غونډې يو شمېر نورو ګډونوالو هم ورته څرګندونې وکړې او له حکومت او طالبانو يې د سراسري اوربند غوښتنه وکړه.
د يادونې ده، په تېرو دوو اوونيو کې دغه درېيم ځل دى چې د بغلان اوسېدونکي د سراسري اوربند د رامنځته کېدو غوښتنه کوي.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP