ازبکستان د بلخ حيرتان بندرکې خپله پوله په يو طرفه ډول وتړله

مزارشريف ( پژواک،۱۲کب ۹۸) ازبکستان د کرونا ويروس د مخنيوي په موخه د بلخ په حيرتان بندر کې له افغانستان سره خپله پوله يو طرفه وتړله.

د بلخ ولايت د حيرتان بندري ښارګوټي امنيه قوماندان مير حبيب الله ګذر  د کب په ۱۲مه، پژواک ته وويل چې ازبکستان نن سهار دغلته خپله پوله له افغانستان سره يو طرفه وتړله.

هغه زياته کړه، پر دغه دروازه يواځې هغه افغانان بېرته هېواد ته راتلی شي، چې دمګړۍ ازبکستان کې دي؛ خو په خبره يې چې له دې خوا څوک هغې اخوا ته نه شي ور تللى.

ګذر هيله وښوده چې ښايي دغه لار به د لنډ مهال لپاره تړلې وي؛ خو زياته يې کړه چې نه پوهېږي ازبکستان به څه وخت بېرته خپله دروازه په نورمال ډول پرانيزي.

د امنيه قوماندان په خبره، ازبکستان د کرونا ويروس د ګواښونو له وېرې خپل لور ته دروازه تړلې ده.

په ورته مهال د بلخ سوداګرۍ خونه له ازبکستان سره د دروازې د تړل کېدو دوام د اندېښنې وړ بولي.

د بلخ د سوداګرۍ خونې اجراييه مديرنصيراحمدقاسمي پژواک ته وويل، دوی ته هم خبر رسېدلی، چې نن سهار ازبکستان خپل لور ته د ورتګ دروازه تړلې ده.

هغه زياته کړه، حيرتان بندر او په ټوله کې ازبکستان د ټول افغانستان زياته برخه اقتصادي اړتياوې پوره کوي او که ياده لاره د ډېر وخت لپاره وتړل شي؛ نو خلک به له جدي ستونزو سره مخ شي.

نوموړي وويل: (( هيله ده دا لاره د وارداتو پر مخ ونه تړل شي، که دا کار وشو؛ نو په بازارونو کې د اجناسو نرخونه څو چنده زيات او همدا راز به موږ د توکو له کمبود سره مخ شو.))

هغه له افغان حکومت څخه غوښتنه وکړه؛ څو په دې تړاو له ازبکستاني چارواکو سره خبرې وکړي او ياده ستونزه هواره کړي.

د بلخ سوداګرۍ خونه وايي، له دې لارې د ټول افغانستان اکثريت اړتيا وړ توکي واردېږي او د دروازې په بندېدو سره به جدي ستونزې رامنځته شي.

په ورته مهال د بلخ ولايت مقام هم تاييدوي چې ازبکستان نن سهار له افغانستان سره خپله پوله تړلې ده.

login or register a new account.