کندوز کې اووه امنيتي سرتېري وژل شوي

کندوز ښار (پژواک، ٣٠ غبرګولى ٩٩): امنيتي سرچيني وايي چې د کندوز په خان اباد ولسوالۍ کې اووه پاڅون کوونکي وژل شوي او يو بل ټپي دى.

کندوز کې يوې امنيتي سرچينې د غبرګولي په ٣٠ مه پژواک خبري اژانس ته وويل چې تېره شپه وسله والو طالبانو د خان اباد ولسوالۍ په مربوطاتو کې د پاڅون کوونکو پر پوستې بريد کړى دى.

سرچينه وايي چې په دغه بريد کې اووه پاڅون کوونکي وژل شوي او يو بل ټپي دى.

خو د کندوز د والي وياند عصمت الله مرادي پژواک ته وويل چې په دغه بريد کې درې پاڅون کوونکي وژل شوي او يو بل ټپي دى.

د مرادي د معلوماتو له مخې، په دغه بريد کې لس وسله وال طالبان هم وژل شوي دي.

بل لورته وسله والو طالبانو تر اوسه په دې اړه څه نه دي ويلي.