کندوز کې څلورو پوليسو ته مرګ ژوبله اوښتې

کندوز ښار (پژواک، ٢٣ زمرى ٩٩): د کندوز امنيتي مسوولين وايي چې په کندوز ښار کې د طالبانو د بريد له امله دوه پوليس وژل شوي او دوه نور ټپيان شوي دي.

د کندوز د امنيې قوماندانۍ وياند هجرت الله اکبري د زمري په ٢٣ مه پژواک خبري اژانس ته وويل، نن غرمه مهال وسله والو طالبانو غوښتل چې د کندوز ښار په چرخ اب سيمه کې د کندوز-تخار لويه لار د ترافيکو پر مخ وتړي، خو د امنيتي ځواکونو له کلک مقاومت سره مخ شول.

هغه وايي چې په دغه جګړه کې امنيتي ځواکونو ته مرګ ژوبله نه ده اوښتې خو طالبانو ته تلفات اوښتي دي.

خو يوې بلې امنيتي سرچينې پژواک ته وويل چې په دغه جګړه کې د څلورمې امنيتي حوزې دوه سرتېري الياس او حسن وژل شوي او دوه نور يې ټپيان شوي دي.

بل لورته وسله والو طالبانو تر اوسه په دې اړه څه نه دي ويلي.