امنيتي مسوولين په کندوز کې ۲۱ طالبانو ته د مرګ ژوبلې اوښتو ادعا کوي

کندوز ښار (پژواک، ٢٩ زمرى ٩٩): د کندوز امنيتي مسوولين وايي چې د دغه ولايت په امام صاحب ولسوالۍ کې ١٢ وسله وال طالبان وژل شوي او نهه نور ټپيان شوي دي.

دغه څرګندونې په هغې خبرپاڼې کې شوې چې د زمري په ٢٩مه په کندوز کې د ٢١٧ پامير قول اردو له لوري پژواک خبري اژانس ته را لېږل شوې ده.

سرچينه وايي چې تېره شپه وسله والو طالبانو د امام صاحب ولسوالۍ په مربوطاتو کې د امنيتي ځواکونو پر پوستو ډله ييز بريدونه کړي دي.

د خبرپاڼې د معلوماتو له مخې، د يادو بريدونو پر مهال ١٢ وسله وال طالبان وژل شوي او نهه نور ټپيان شوي دي.

سرچينې د يادو بريدونو پر مهال د امنيتي ځواکونو او ملکي وګړو د مرګ ژوبلې په اړه څه نه دي ويلي.

دغه راز د امام صاحب ولسوالۍ د بازار اوسېدونکي امرالدين پژواک ته وويل چې هره شپه په دې ولسوالۍ کې د امنيتي ځواکونو او وسله والو طالبانو ترمنځ جګړې وي.

ده وويل: ((يواځې تېره شپه نه، بلکې هره شپه دلته جنګ وي، دواړه لوري له درنو وسلو هم کار اخلي چې خلک يې سخت اندېښمن کړي دي.))

بل لور ته وسله والو طالبانو تر اوسه په دې اړه څه نه دي ويلي.