د کابل لپاره د داعش ډلې د استخباراتو مرستيال نيول شوى

کابل (پژواک، ٢٣ وږى ٩٩): ملي امنيت وايي چې د کابل لپاره د داعش وسله والې ډلې د استخباراتو مرستيال په ننګرهار ولايت کې نيول شوى دى.

دغه څرګندونې په هغې خبرپاڼې کې شوې چې د ملي امنيت د صفر ۲ قطعې له لوري د وږي په ٢٣مه رسنيو ته استول شوې ده.

په اعلاميه کې راغلي چې د ملي امنيت صفر دوه قطعې د ننګرهار ولایت د سره رود ولسوالۍ په ډنډ سیمه کې د داعش ډلې د ځپلو په موخه ځانګړي عملیات ترسره کړي دي.

سرچينه وايي چې په دغو عملیاتو کې قاري امین الله مشهور په امین حسین د کابل ولایت لپاره د داعش ډلې استخباراتو مرستيال او پلان جوړوونکى نيول شوى دى.

خبرپاڼه زياتوي چې په یادو عملیاتو د ملي امنیت ځانګړو ځواکونو یو میل تومانچه، درې شاجورونه، دوه قبضې لاسي بمونه او یوه چه په لاس ورغلي دي.

په اعلامیه کې دا هم ویل شوي چې د داعش ډلې دغه غړي په کابل ولایت کې د اهل هنود درمسال په بريد کې لاس درلود.

په دې اعلامیه کې ذکر شوي چې په ترسره شوو عملیاتو کې ولسي خلکو ته هېڅ زیان نه دی رسېدلی.