کابل (پژواک، ٢۵ وږى ٩٩): په افغانستان کې د ناټو ملکي سفير ويلي چې د طالبانو له خوا تاوتريخوالى نور د منلو نه دى.
د ناټو ملکي سفير سټيفانو پونټيکورو دغه څرګندونې د افغانستان د ولسمشر له لومړي مرستيال امرالله صالح سره د ليدنې پر مهال کړې دي.
هغه په خپل ټويټر کې ليکلي چې په دې ليدنه کې يې د افغانستان د سولې پر پروسې او وروستيو سياسي او امنيتي حالاتو خبرې وکړې.
د ناټو ملکي استازي ويلي چې د طالبانو له خوا وروستي مخ پر زياتېدونکی تاوتريخوالى نور د منلو وړ نه دی.
نوموړي له طالبانو غوښتي چې تاوتريخوالى کم کړي او د سولې لپاره خپله ژمنتيا وښيي، څو د افغانستان اوږدې شخړې ته د سياسي لارې د هواري لاره برابره شي.
سټيفانو ويلي: ((په دې ليدنه کې مې ټينګار وکړ چې د سولې بين الافغاني مذاکراتو کې بايد د افغانستان د اسلامي جمهوري دولت پلاوى متحد وي؛ ځکه چې له بې اتفاقۍ طالبان ګټه پورته کوي.))
د هغه په وينا، اوس د دې وخت را رسېدلى چې د ټولو لپاره د سولې هڅې وشي او د تېرو ١٩ کلونو لاسته راوړنې وساتل شي.
login or register a new account.
