په ولسي جرګه کې د اروزګان وکيل کابل کې له يوه بريده روغ ووت

کابل (پژواک، ٣٠ وږى ٩٩) : په ولسي جرګه کې د اروزګان وکيل بسم الله جان محمد په کابل ښار کې له يوه وسله وال بريده روغ وتلى دى.

د هغه د کورنۍ يو تن غړي حاجي وحيدالله د  وږي په ٣٠مه، پژواک اژانس ته وويل چې دا بريد نن غرمه په شاوخوا دوولس نيمو بجو د کابل ښار ددارالامان پر سړک  شوى دى.

نوموړي زياته کړه، چې يوه وسله وال تن د درالامان د قلعه علي مردان په سيمه کې د يوه دوکان له شا څخه پر وکيل ډزې وکړې.

حاجي وحيدالله وايي چې وکيل بسم الله جان له بريده روغ ووت، خو بريدګر په سيمه کې د امنيتي ځواکونو له خوا ووژل شو.

خو د کابل د پوليسو وياند فردوس فرامرز وايي چې د کابل دارالامان سيمه کې داسې کومه پېښه نه ده شوې.