په بدخشان کې د يوې کورنۍ پنځه غړي ووژل شول

کابل(پژواک،۳تله۹۹): د بدخشان امنيتي مسوولين وايي چې ددغه ولايت په درايم ولسوالۍ کې د طالبانو په بريد کې د يوې کورنۍ پنځه غړي وژل شوي او يوبل تن ټپي دى.

د بدخشان د امنيه قوماندانۍ وياند ثناءالله روحاني وويل: (( وسله والو طالبانو نن سهار پنځه نيمې بجې د درايم ولسوالۍ د باغ صوفي په کلي کې د يوې کورنۍ پنځه غړي وژلي او يوبل ټپي شوى دى.))

ده زياته کړه چې ياد کسان هغه مهال تر بريد لاندې راغلل چې ددغې ولسوالۍ له پتاوک سيمې څخه مدرسې ته روان وو.

د نوموړي په خبره، چې يادو کسانو ددغې ولسوالۍ په مدرسه کې درس وايه .

د هغه په وينا، چې وژل شوي او ټپي کس ددغې ولسوالۍ کلينيک ته انتقال شوي دي.

د روحاني په خبره ، چې په وژل شويو کسانو کې دوه کم عمره ماشومان هم شامل دي.

تراوسه پورې وسله والو طالبانو په دې اړه څه نه دي ويلي .