کابل (پژواک، ٥ تله ٩٩): اوکرايني چارواکو ویلي چې د دغه هېواد په ختیځ کې یوه پوځي الوتکه لوېدلې چې له امله يې د هوايي ځواک لږ تر لږه ۲۲ محصلين په کې وژل شوي.
د اوکراين د بېړنیو چارو وزارت چارواکو ویلي، انتنوف ٢٦ ډوله الوتکه کې ۲۷ کسان سپاره وو او ختیځ خارکیف ښار ته څېرمه د کوزېدو پر مهال لوېدلې ده.
د سرچينو د معلوماتو له مخې، د خارکیف هوايي ځواک پوهنتون محصلین د تمرین پر مهال الوتکه کې لېږدول کېدل.
يادې سرچينې ويلي، په الوتکه کې دوه ټپي کسان موندل شوي، د شپې د درېیو بجو د ترې تم شوو کسانو لټون روان و.
الوتکې د لوېدو د لامل په اړه هم څېړنه روانه ده.
د بېړنیو چارو وزارت ویلي چې دغه الوتکه په چوهیف ښار کې له پوځي هوايي ډګره دوه کیلومتره لرې لوېدلې ده.
د الوتکې له لوېدو سره د پېښې ځای کې لوګی او اور لیدل شوی خو وروسته اور وژل شوی دی.
login or register a new account.
