خوست ښار کې چاودنې یو تن وواژه او شپږ نور یې ټپیان کړل

خوست (پژواک، ۹ تله ۹۹): د خوست ښار په مجاهد څلور لاري کې په یوه ریکشا کې د لېږدوونکي ماين چاودنې یو کس وواژه او شپږ نور يې ټپيان کړل.

چاودنه نن مازديګر نږدې پنځه بجې وشوه. 

د خوست امنيه قوماندانۍ مطبوعاتي مسوول عادل حيدر پژواک خبري اژانس ته وويل چې چاودنه په ریکشا کې د لېږدوونکي ماین له امله وه.

د هغه په وينا، چاودنې خپله ماین لیږدوونکی وژلی او شپږ ملکي کسان یې ټپيان کړي دي.

حیدر وایي چې ټپيان روغتون ته لېږدول شوي او روغتیایي حالت یې د ډاډ وړ دی.