د بغلان د امنيت امر د ژورو ټپونو له امله ومړ

پلخمري (پژواک، ١٧ تله ٩٩): امنيتي مسوولين وايي چې د بغلان ولايت د امنيې قوماندانۍ د امنيت آمر د ژورو ټپونو له امله په روغتون کې ساه ورکړې ده.

د بغلان د امنيې قوماندانۍ وياند احمد جاويد بشارت د تلې په ١٧مه پژواک خبري اژانس ته وويل چې د دغه ولايت د امنيې قوماندانۍ د امنيت آمر سمونوال محمد ورا اندرابي د کابل په وزير اکبرخان روغتون کې د ژورو ټپونو له امله ساه ورکړې ده.

هغه زياته کړه: ((ټپونه يې ډېر ژور و، دلته يې درملنه نه کېده نو کابل ته يې انتقال کړ، خو هلته يې هم درملنه ونه شوه او ساه يې ورکړه.))

دغه راز د کورنيو چارو وزارت هم د يوې خبرپاڼې په خپرولو سره ويلي چې سمونوال محمد ورا اندرابي د ژورو ټپونو له امله مړ شوى دى.

د يادونې ده چې سمونوال محمد ورا تېره اوونۍ د بغلان ولايت په ډنډ غوري سيمه کې له وسله والو طالبانو سره په جګړه کې ټپي شوى و، چې تېره ورځ يې په روغتون کې ساه ورکړې ده.