کابل (پژواک، ١١ لړم ٩٩) : د بهرنيو چارو سرپرست وزير حنيف اتمر د امريکا له سرپرست سفير سره د افغانستان د وروستیو امنیتي او سیاسي بدلونونو، د سولې خبرو اترو پر وړاندې د پرتو خنډونو په اړه خبرې کړې دي.
د افغانستان د بهرنیو چارو وزارت له خوا د لړم په ١١مه، پژواک اژانس ته په يوه را استول شوې خبرپاڼه کې راغلي چې محمد حنیف اتمر په کابل کې د امریکا د متحده ایالاتو سفارت له شارژدافیر او سرپرست روز ویلسون سره وکتل.
سرچينې زياته کړې، په دې کتنه کې د بهرنیو چارو سرپرست وزیر د افغانستان اسلامي جمهوریت او امریکا متحده ایالاتو تر منځ ستراتېژیکو اړیکو په یادونې سربېره، په تېرو ۱۹ کلونو کې د افغانستان له دولت سره د هغه هېواد د دوامدارو مرستو او ملاتړ او له افغان سولې بهیر څخه د هغه هېواد د ملاتړ له امله مننه وکړه او دواړو لورو په دې هکله مفصلې خبرې وکړې.
په خبرپاڼه کې راغلي، چې دغه راز دواړو لورو د افغانستان د وروستیو امنیتي او سیاسي بدلونونو، د سولې خبرو اترو پر وړاندې د پرتو خنډونو، د دې بهیر د بریاليتوب لپاره د سیمه يیز او نړیوال ملاتړ پر ارزښت او د کابل او واشنګټن تر منځ د همکاریو د پياوړتیا په هکله خبرې وکړې او له یو بل سره یې نظریات شریک کړل.
د بهرنيو چارو وزارت ويلي، په پای کې حنيف اتمر په افغانستان کې سولې او ثبات ته د رسېدو برخه کې، د افغانستان له خلکو او دولت سره د امریکا متحده ایالاتو ملاتړ مهم وباله.
سرچينې زياته کړې، روز ویلسون هم اتمر ته له افغانستان سره د خپل هېواد د دوامداره ملاتړ او همکاریو ډاډ ورکړ.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن