مزارشريف (پژواک، ۱۵ لړم ۹۹): د بلخ په شولګر ولسوالۍ کې د ولسي پاڅون کوونکو پر قوماندان نظرګل خان چاودنه شوې چې له امله يې درې کسان وژل شوي او ١٦ نور ټپيان دي.
د بلخ د والي وياند منير فرهاد د لړم په ١٥مه، پژواک ته وويل، چې د سيمييزو پاڅونوالو قوماندان نظر ګل پر قرارګاه دوه پرله پسې چاودنې شوې چې له امله يې ۳ کسان وژل شوي او ۱۶ نور ټپيان دي.
هغه زياته کړه چې په وژل شوو کې د قوماندان نظرګل یو زوی او په ټپيانو کې خپله قوماندان شامل دي.
د فرهاد په وينا، نور وژل شوي او ټپيان ټول د قوماندان نظرګل اړوند ولسي پاڅون کوونکي دي.
د شولګر ولسوالۍ اوسېدونکي وايي چې دغه چاودنه نن (د لړم ١٥مه) غرمه مهال د کرني سای په سيمه کې د هغه په قرارګاه کې شوې ده.
د يادې سيمې يوه اوسېدونکي احمد ولي پژواک اژانس ته وويل چې چاودنه د چسپکي ماين له امله رامنځته شوې چې په پايله کې يې د قوماندان نظرګل يو زوی او يو ساتونکی وژل شوي او خپله د قوماندان په ګډون ۱۲ کسان ټپيان شوي دي.
هغه زياته کړه چې ټپيان ټول د قوماندان نظرګل اړوند وسله وال دي چې د ولسي پاڅون کوونکو په نوم په شولګر ولسوالۍ کې فعاليت کوي.
د شولګر ولسوالۍ امنیه قوماندان سید عارف اقبالي تایید کړه چې چاودنه د نظرګل قوماندان پر قرارګاه شوې خو نور معلومات يې ورنه کړل.
د دې چاودنو مسووليت تر اوسه چا پر غاړه نه دى اخيستى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن