کابل (پژواک، ۲۵ لړم ۹۹): د مشرانو جرګې یو شمېرغړي په هېواد کې د امنیتي وضعیت په اړه د شکایت ترڅنګ، افغانستان ته د پاکستان د لومړي وزیر عمران خان د سفر د مثبتو پایلو په اړه خوښ نه دي او ټینګار کوي چې پاکستان باید د افغان حکومت د وسله والو مخالفینو له ملاتړه لاس واخلي.
د افغانستان د بهرنیو چارو وزارت د معلوماتو له مخې، ټاکل شوې چې د پاکستان لومړی وزیر عمران خان روانه اوونۍ د افغان حکومت په رسمي بلنه کابل ته راشي.
په مشرانو جرګه کې د کاپیسا د خلکو استازي محی الدین منصف د دې جرګې په نننۍ ناسته کې افغانستان ته د عمران خان سفر ته په اشارې وویل چې د افغانستان حکومتي چارواکو په تېر کې پاکستان او پاکستاني چارواکو افغانستان ته سفرونه درلودل، خو د افغانستان پر وضعیت یې مثبت اغېز نه درلود او د افغان حکومت د وسله والو مخالفینو ملاتړ لا هم د پاکستان له خوا ترسره کېږي.
هغه زیاته کړه: «هیله لرو څو پاکستان د افغانستان په اړه پر خپله تګلاره له سره غور وکړي، او د دولت پر وسله والو مخالفینو فشار راوړي څو د سولې له بهیر سره یو ځای شي.»
د هغه په وینا، پاکستان یو اسلامي او د افغانستان ګاونډی هېواد دی او په افغانستان کې د امنیت ټینګښت په هغه هېواد کې هم د امنیت سبب کېږي او د امنیت د ټینګښت په صورت کې به د دواړو هېوادونو اقتصاد وده وکړي.
د جرګې یو شمېر نورو غړو هم ورته څرګندونې درلودې او د پاکستان له حکومت یې غوښتي چې د افغانستان په اړه پر خپله پالیسۍ له سره غور وکړي.
د مشرانو جرګې لومړي نایب محمد عالم ایزدیار چې د جرګې د نن ورځې د ناستې مشري یې کوله، هم افغانستان ته د عمران خان د سفر په اړه وویل: «موږ د تګ او راتګ څو کلنه تجربه لرو، خو له بده مرغه د افغانستان پر وضعیت یې مثبت اغېز نه دلود، هیله لرو چې دا ځل د پاکستان حکومت د افغانستان په اړه لازم صداقت ولري او پر طالبانو لازم فشار راوړي.»
هغه زیاته کړه: «د پاکستان د حکومت له پرله پسې سفرونو او ژمنو سربېره، په افغانستان کې جګړه توده شوې او د دغه هېواد د وسله والو مخالفو ډلو له تمویله یې لا هم لاس نه دی اخیستی.»
هغه د عمران خان سفر ته په اشارې وویل: «هیله لرو چې د افغانستان د حکومت رهبري له پاکستاني چارواکو سره په صراحت خبرې وکړي او ټول مسایل د مېز پر سر واچول شي او هغه څه چې پاکستان یې غواړي، باید روښانه وي.»
ایزدیار هم د افغانستان په اړه د پاکستان پر سیاست د بیاکتنې غوښتنه وکړه او ویې ویل، تر هغه چې پاکستان د افغان حکومت د مخالفینو له ملاتړ او تمویله لاس وا نه خلي، د افغانستان وضعیت به بدل نه شي.
د ایزدیار په وینا، د تاوتریخوالي دوام په داسې حال کې چې په دوحه کې د افغانانو ترمنځ د سولې خبرې هم پیل شوې، د اندېښنې وړ وباله او ویې ویل چې دغو تاوتریخوالو د خلکو د سولې هیلې پر ناهیلیو اړولې دي.
هغه وایي: «د افغانستان حکومت باید په دې اړه پرېکړه وکړي؛ ځکه دوې میاشتې کېږي چې د مذاکراتو اجنډا ټاکل شوې او د راپورونو له مخې، د طالبانو پلاوی نه غواړي چې د افغانستان د حکومت له پلاوي سره خبرې وکړي.»
هغه نن د یادې جرګې په ناسته کې په هېواد کې د ناامنیو زیاتوالي او د دولت د وسله والو مخالفینو بریدونو ته په اشارې وویل، له حکومته یې وغوښتل څو وضعیت ته په کتو پر خپله امنیتي او دفاعي ستراتیژۍ له سره غور وکړي.
هغه زیاته کړه: «اوسني وضعیت له مختلفو اړخونو اندېښنې رامنځته کړې دي او دغه وضعیت حکومت د یوه مسوول په توګه تر پوښتنې لاندې راوستلی دی، په داسې شرایطو کې چې خلک په وینو کې ډوب دي، یو شمېر د چوکۍ او قدرت په فکر کې دي، باید مسوولانه عمل وشي او هغه چا چې مسوولیت یې پر غاړه اخیستی باید ځواب ورکوونکی وي.»
هغه وايي چې د حکومت د وروستيو اقداماتو په پایله کې په کابل کې وسله والې غلاوې او جنايي جرمونه کم شوي دي، خو "تروریستي او ځانمرګي" بریدونه لاهم دوام لري.
GET IN TOUCH
NEWSLETTER
SUGGEST A STORY
PAJHWOK MOBILE APP