سمنګان کې یو ځانمرګی موخې ته له رسېدو مخکې نیول شوی

ایبک (پژواک، ۲۸ لړم ۹۹): د سمنګان پولیسو یو ځانمرګی چې په دغه ولایت کې یې د برید ترسره کولو هوډ درلود، موخې ته له رسېدو مخکې نیولی دی.

د سمنګان د امنیې قوماندانۍ مطبوعاتي مسوول منیر رحیمي وایي، نیول شوی کس چې د طالبانو ډلې اړوند دی، د کندوز په امام صاحب ولسوالۍ کې د ماین جوړولو، د وسلو تطبیقولو، د ترهګرۍ، چاودنو او ځانمرګي فعالیتونو په برخو کې یې روزنه لیدلې ده.

د هغه په ​​وینا، نیول شوی کس پر امنیتي ځواکونو د برید لپاره له کندوزه سمنګان ته راغلی و، خو تېره ورځ وروسته له غرمې هدف ته له رسېدو مخکې د حضرت سلطان ولسوالۍ په رده کلان سیمه کې چې د طالبانو او حکومتي ځواکونو ترمنځ د جګړې کرښه ده، نیول شوی دی.

سرچینې د دغه کس هویت نه دی څرګند کړی، وایي چې له لومړنیو پلټنو وروسته عدلي او قضایي بنسټونو ته سپارل کېږي.

طالبانو تر اوسه په دې اړه څه نه دي ویلي.