کابل (پژواک، ٣ لېندۍ ٩٩): د افغان سولې لپاره د امريکا ځانګړي استازي د پاکستان د لومړي وزير عمران خان د هغې ژمنې هرکلى کړی چې په افغانستان کې يې د تاوتريخوالي کمولو په اړه کړې ده.
د پاکستان لومړي وزير عمران خان تېره اوونۍ کابل ته د سفر پر مهال له افغانستان سره د سولې پروسه کې د همکارۍ ډاډ ورکړ او ترڅنګ یې د دواړو هېوادونو ترمنځ ګډه اعلاميه هم خپره شوه.
د افغانستان د سولې لپاره د امريکا ځانګړي استازي زلمي خليلزاد د افغانستان او پاکستان په اړيکو کې د مثبتونو پرمختګونو هرکلى کړى دى.
هغه د لېندۍ په ٣مه په خپل ټويټر کې ليکلي که چېرې د دواړو هېوادونو ترمنځ اعلان شوې ګډه اعلاميه عملي شي؛ نو دا به په سيمه کې د سولې او پرمختګ لپاره يو ښه چانس ثابت شي.
نوموړي زياته کړې، کابل ته د پاکستان د لومړي وزير عمران خان له سفر سره په بېلابېلو برخو کې د دواړو هېوادونو اندېښنې راکمې شي.
خليلزاد ويلي: “زه دواړو هېوادونو ته مبارکي ورکوم چې په ګډه قطعنامه کې يې مهمو نقطو ته اشاره کړې ده.”
د هغه په وينا، په دې ګډه اعلاميه کې راغلي چې دواړه هېوادونه به خپلې خاورې د یو بل پر ضد کارولو ته اجازه نه ورکوي.
د امريکا ځانګړي استازي دغه راز د پاکستان د هغې ژمنې هرکلى هم کړى چې غواړي په افغانستان کې د تاوتريخوالي په کمولو کې همکاري وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن