پر طرز العمل له موافقې وروسته خلیلزاد قطر ته روان شوی

کابل (پژواک، ۱۳ لیندۍ ۹۹) : د افغان سولې لپاره د امریکا ځانګړي استازي زلمي خلیلزاد پر سولې د سلا مشورو لپاره د قطر په لوري روان شوی دی.

خلیلزاد د لیندۍ په ۱۳مه، په ټویټر کې لیکلي چې قطر ته په لاره به لومړی انقرې ته ځي او هلته به د ترکیې له چارواکو سره پر افغان سولې پروسې خبرې اترې کوي.

هغه زیاته کړې چې له ترکیې به نیغ په نیغه قطر ته ځي چېرته به چې د بین الافغاني مذاکراتو دواړو لوریو سره د لیدنو ترڅنګ پر طرز العمل د شوې موافقې او پرمختګونو په اړه د خبرو ترڅنګ هغوی و هڅوي چې نورو پرمختګونو سره هر اړخیز اوربند ته لاره هواره کړي.

خلیلزاد وایي چې تر قطر وروسته به د افغان سولې په تړاو د ملاتړ ترلاسه کولو په موخه یو شمیر نورو هیوادونو ته هم سفر کوي.

دا په داسې حال کې ده، چې پرون په قطر کې د افغان دولت او طالبانو لخوا په یوه ګډه اعلامیه کې د مقدمې په ګډون د طرزالعمل په ۲۱ټولو مادو توافق  اعلان شو.

په اعلامیه کې راغلي چې ډیر ژر به به پر اجنډا بحث پیل شي,خو تراوسه د یادو شویو ۲۱مادو په اړه معلومات نه دي په ډاګه شوي.