کابل (پژواک، ١٣ ليندۍ ٩٩): د امريکا د ګډو ځواکونو لوى درستيز وايي چې پنټاګون په افغانستان کې د سرتېرو کمولو پلان تصويب کړى، خو دوه لويې پوځې اډې به يې وي.
د امريکا د ګډو ځواکونو لوی درستیز جنرال مارک مېلي دغه څرګندونې پرون له رويټرز خبرى اژانس سره د يوې مرکې په ترڅ کې کړې دي.
مېلي وايي چې پنتاګون د امریکایي سرتېرو د کمولو پلان تصویب کړی؛ خو دا هېواد به په افغانستان کې دوه لویې پوځي اډې ولري.
مارک مېلي دا هم ویلي، چې پر دغو دوه امریکایي اډو سربېره به په افغانستان کې د سپوږمکیو څو اډې هم وساتل شي.
مېلي زیاته کړې چې په افغانستان کې به د امریکايي ځواکونو له کمېدو سره سره له افغان ځواکونو سره دوى همکاري او د داعش او القاعدې پر وړاندې عملیاتي ماموریت روان وي.
دا په دا سې حال کې ده چې څه موده وړاندې د امريکا ولسمشر ډونالډ ټرمپ ويلي و چې په افغانستان کې د خپلو سرتېرو شمېر ۲۵۰۰ ته راکموي.
د يادونې ده چې امريکا دا مهال په افغانستان پنځه سترې او نورې وړې اډې هم لري.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن