کابل (پژواک، ۱۵ لیندۍ ۹۹): په قطر کې د دولت د مرکچي پلاوي وياند نادري وايي چې د افغان دولت او طالبانو کاري کمېټې نن د سولې خبرو پر اجنډا خبرې پیل کړې.
نادر نادري ويلي چې د افغانستان د دولت او مقابل لوري ترمنځ د اجنډا موادو د ترتيبولو لپاره د ګډې کمېټې لومړۍ ناسته نن (د لیندۍ ۱۵مه) جوړه شوه.
ده زياته کړې، په دې ناسته کې د اجنډا پر اړوندو مسايلو بحث وشو او د دې ګډې کمېټې ناسته به سبا هم دوام ولري.
شاوخوا درې میاشتې مخکې په لومړي ځل په قطر کې د افغانستان دولت او طالبانو د مرکچي پلاوو ترمنځ په رسمي توګه د سولې خبرې پیل شوې.
د رسمي خبرو له پیل وروسته د دولت او طالبانو د مرکچي پلاوو له غړو د تماس ډله وټاکل شوه ترڅو د سولې خبرو د اجنډا او نورو غونډو لپاره طرزالعمل نهایي کړي.
له ډېرو بحثونو او ناندریو وروسته، درې ورځې مخکې (د لیندۍ ۱۲مه) د افغان دولت او طالبانو د سولې مذاکراتو پر طرزالعمل توافق وشو.
تردې يوه ورځ وروسته (د لیندۍ ۱۳مه) په قطر کې د دولت د مرکچي پلاوي يوه غړي پژواک ته ويلي و، ډېر احتمال شته چې د راتلونکې شنبې په ورځ د سولې خبرو د اجنډا په اړه د دواړو لوریو ترمنځ لومړۍ غونډه جوړه شي.
سرچينې زياته کړې وه، طبعا د حکومت لومړۍ موضوع اوربند دی او وبه کتل شي چې مقابل لوری لومړی په کومه موضوع بحث کول غواړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن