کابل (پژواک، ٢٥ ليندۍ ٩٩): ولسمشر اشرف غني د امريکا د کانګرېس له مشرې سره ددواړو هېوادونو د دوامدارو ژمنو، سولې پروسې، اوربند او تاوتريخوالي کمولو په اړه خبرې کړې دي.
له ارګ څخه د ليندۍ په ٢٥مه، پژواک اژانس ته په يوه رااستول شوې خبرپاڼه کې راغلي چې ولسمشر محمد اشرف غني پرون ماښام د امريکا د کانګرس رييسې مېرمن نانسي پلوسي او د دغه هېواد د مجلس استازو له يو شمېر غړو سره د ويډيو کنفرانس له لارې خبرې وکړې.
سرچينې زياته کړې، په دغه ويډيو کنفرانس کې د هېواد لومړۍ مېرمن، د ولسمشر مرستيال امرالله صالح، د بهرنيو چارو وزير محمدحنيف اتمر، د ملي امنيت سلاکار ډاکټر حمدالله محب او د چارو ادارې لوی رييس ډاکټر فضل محمود فضلي هم شتون درلود، په امريکا متحدو ايالتونو کې د افغانستان سفيره مېرمن رويا رحماني هم د ويډيو کنفرانس له لارې وصل وه.
په خبرپاڼه کې راغلي، چې دواړو لوریو له افغانستان سره د امریکا د دوامدار تعهد، سولې پروسې او د هغو د راتلونکو پړاوونو، ښځو حقونو او اوربند پر عاجلې اړتيا د بحث او خبرو پر مهال د تاوتریخوالي د زیاتوالي په اړه خپلې اندېښنې هم څرګندې کړې.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن