کابل (پژواک، ١٧ مرغومى ٩٩): د افغانستان سولې لپاره د امريکا ځانګړي استازي زلمي خليلزاد تر اوسه ولسمشر سره نه دي ليدلي، خو د هغه له درې نږدې همکارانو حنيف اتمر، ډاکټر حمدالله محب او د چارو ادارې رييس ډاکتر فضلي سره ليدلي دي.
د بهرنيو چارو وزارت له خوا د مرغومي په ١٧مه،پژواک اژانس ته په يوه رااستول شوې خبرپاڼه کې راغلي چې په دغې ليدنه کې دامريکا د سفارت شازدافير او د ناټو قوماندان جنرال سکاټ مېلر هم شتون درلود.
په خبرپاڼه کې راغلي، په دې ليدنه کې د سولې د دويم پړاو خبرو او وروستيو پرمختګونو په اړه په تفصيل سره خبرې وشوې.
د بهرنيو چارو وزير حنيف اتمر په خپلو خبرو کې په افغان سولې پروسه کې د امريکا د هڅو ستاينه وکړه او په دغې پروسه کې يې پر سيمه ييزې او نړيوالې اجماع ټينګار وکړ.
په خبرپاڼه کې راغلي، د امريکا ځانګړي استازي زلمي خليلزاد د بين الافغاني خبرو د دويم پړاو پر پيلېدو خوښي څرګنده کړه او په دغه برخه کې يې د خپل هېواد د دوامدارو همکاريو ډاډ ورکړ.
بلخوا له ملي امنيت شورا څخه په يوه خپره شوې خبرپاڼه کې راغلي چې په دغې ليدنه کې د طالبانو له خوا د جګړې پر کمولو او اوربند، د افغان سولې په پروسه کې د سيمه ييزې اجماع د ايجاد او بين المللي همکارۍ د را جلبولو په تړاو خبرې وشوې. .
سرچينې زياته کړې،دواړو لوريو هوکړه وکړه چې د ولسمشر محمد اشرف غني او امريکا په همغږۍ به په سوله کې د يوه خپلواک، متحد او ولسواک افغانستان لپاره ګډ کار کوي او افغانستان به داسې سولې ته رسوي چې له ځان او نړۍ سره په ثبات کې د تر لاسه شويو ارزښتونو د ساتنې او پراختيا ځواک ولري.
د امريکا ځانګړى استازى زلمى خليلزاد چې وړمه شپه کابل ته راغلى، پرون يې د ملي روغې جوړې شورا رييس ډاکټر عبدالله، سياسي او جهادي مشر استاد سياف او پخواني ولسمشر حامد کرزي سره يې ليدلي دي.
خو تر اوسه د خليلزاد او ولسمشر اشرف غني ترمنځ ليدل نه دي شوي.
خليلزاد کابل ته تر راتګ مخکې پاکستان او قطر ته هم سفر کړى و.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن