دفاع وزارت: لوګر کې د طالبانو له یوه زندانه ۲۲ کسان راخوشي شول

کابل (پژواک، ۷ سلواغه ۹۹): د ملی دفاع وزارت وایي چې د کومانډو ځواکونو عملیاتو پر مهال په لوګر کې د طالبانو له یوه زندانه د ۱۵ ملکي وګړو به ګډون ۲۲ کسان را خوشي شول.

د دغه وزارت په یوه خپره شوې خبرپاڼه کې چې نن (سې شنبې) خپره شوې ده، راغلی چې دغه کسان تېره شپه د کومانډو ځواکونو د عملیاتو پر مهال د لوګر په څرخ ولسوالۍ کې خوشي شوي دي.

سرچینه وایي چې په خوشي شوو کسانو کې ۷ امنیتي امنیتي سرتېري او ۱۵ د سیمې اوسېدونکي دي.

د ملی دفاع وزارت وایي چې د عملیاتو پر مهال درې وسله وال طالبان نیول شوي او یو شمېر وسلې او مهمات یې هم امنیتي ځواکونو ته په لاس ورغلي دي.

تر اووسه طالبانو په دې اړه څه نه دي ویلي.

دا په داسې حال کې ده چې څه موده مخکې کومانډو ځواکونو د عملیاتو پر مهال د یوه نظامي په ګډون ۲۷ کسان په نهر سراج ولسوالۍ کې خوشي کړي وو.