کابل (پژواک، ٩ سلواغه ٩٩): د امريکا د بهرنيو چارو وزير انټوني بلينکن تاييد کړې چې د افغان سولې لپاره د بهرنيو چارو وزارت ځانګړى استازى زلمى خليلزاد به خپل ماموريت ته دوام ورکوي.
د رويټرز خبري اژانس راپور له مخې، د امريکا بهرنيو چارو نوي وزير انټوني بلينکن پرون په واشنګټن کې خبريالانو ته خبرو کې ويلي چې له خليلزاد يې غوښتي څو خپل ماموريت ته دوام ورکړي.
له دې مخکې ځينو رسنيو خبر ورکړى و چې د امريکا د نوي ولسمشر جو بايډن حکومت د خليلزاده ماموريت تمديد کړى دى.
خليلزاد د پخواني ولسمشر ټرمپ له خوا د افغان سولې لپاره ځانګړى استازى ټاکل شوى و او نوموړي تر نږدې يونيم کال مذاکراتو وروسته له طالبانو سره په قطر کې تړون لاسليک کړ.
خو د امريکا نوي حکومت د ملي امنيت سلاکار او د دفاع وزير دواړو خبر ورکړى چې له طالبانو سره په قطر کې لاسليک شوى تړون ارزوي.
دا په داسې حال کې ده چې د افغانستان ملي امنيت سلاکار دوه کاله مخکې امريکا ته د سفر پر مهال د خليلزاد پر ماموريت نيوکې کړې وې چې له امله يې د دواړو هېوادونو اړيکې هم ترينګلې شوې.
په ټوله کې افغان دولت د خليلزاد له ماموريته ناخوښ دى او وايي چې هغه طالبانو ته ډېر ارزښت ورکړى دى.
کابل ته د خليلزاد وروستي سفر پر مهال ولسمشر اشرف غني ورسره له ليدنې ډډه کړې وه.
Views: 89
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن