کابل (پژواک، ٩ سلواغه ٩٩): د افغانستان د وسله وال پوځ لوى درستيز ستر جنرال ياسين ضيا د ايران د ملي امنيت شورا رييس علي شمخاني وروستيو څرګندونو ته کلک غبرګون ښودلى دى.
علي شمخاني پرون په تهران کې د ملا برادر په مشرۍ د طالبانو له پلاوي سره تر ليدنې وروسته په خپل ټويټر کې ليکلي و چې دغه ډله اوس هم له امريکا سره مبارزې ته ژمنه ده.
هغه زياته کړې وه د طالبانو هغه غړي هم له امريکا سره له مبارزې لاس نه دی اخيستی چې ۱۳ کلونه يې تر شکنجې لاندې په ګوانتانامو زندان کې تېر کړي دي.
خو د افغانستان د وسله وال پوځ لوى درستيز ستر جنرال ياسين ضياء نن د سلواغې په ٩مه، په خپل ټويټر کې د شمخاني څرګندونو ته غبرګون ښودلى دى.
هغه ويلي چې وسله وال طالبان او د دغې ډلې مشران له امريکا سره مبارزې ته ژمن دي.
ده زياته کړې: “د ايران د ملي امنيت عالي شورا د مشر په توګه د افغانستان د جګړې په اړه ستاسې درک ناسم دی.”
نوموړي ويلي، طالبان د امريکا نه، بلکې د افغانستان د خلکو پر وړاندې جنګېږي.
د ولسمشر سلاکار شاه حسين مرتضوي هم په خپله فيسبوک پاڼه کې ليکلي : ” طالبانو تېر يوه کال کې پر هېڅ امريکايي بريد نه دی کړى او د افغانستان د خلکو د وژنې لپاره بايد د طالبانو اراده ونه ستايل شي.”
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن