تېرو ٢٤ ساعتونو کې ۶۹ کسان په کرونا اخته او یو تن یې له امله مړ شوی دی

کابل (پژواک، ۱۰ سلواغه ٩٩): د عامې روغتيا وزارت وايي چې په تېرو ٢٤ ساعتونو کې د کرونا ۶۹ مثبتې پېښـې ثبت شوې دي چې له دې سره په افغانستان کې پر کرونا ويروس د اخته کسانو شمېر ۵۵۰۰۸ ته ورسېد.

دغه څرګندونې په هغې خبرپاڼې کې شوي چې د سلواغې په لسمه د عامې روغتيا وزارت له لوري پژواک خبري اژانس ته رالېږل شوې ده.

په خبرپاڼه کې راغلي چې په تېرو ٢٤ ساعتونو کې د هېواد په لابراتوارونو کې د کرونا ويروس ۱۷۹۰ شکمنې پېښې ازمايل شوې چې ۶۹ يې مثبتې دي.

سرچينه وايي چې د يادو پېښو په ثبتېدو سره په هېواد کې پر کرونا ويروس د اخته کسانو شمېر ۵۵۰۰۸ ته لوړ شو.

د عامې روغتيا وزارت د معلوماتو له مخې، په تازه ثبت شويو پېښو کې ۲۶ کسان په هرات، ۱۹ کسان په ننګرهار، ۴-۴ کسان په لغمان او خوست، دوه – دوه کسان په کابل، کندهار، بلخ، میدان وردګ او ارزګان، یو – یو کس په پکتیا، بغلان، کندهار، بدخشان، کاپیسا او سرپل ولایتونو کې په کرونا ويروس اخته شوي دي.

خبرپاڼه کې زياته شوې چې په تېرو ٢٤ ساعتونو کې ۲۳ کس کسان له کرونا ناروغۍ بېرته روغ شوي چې له دې سره په هېواد کې له کرونا ويروسه د بېرته روغ شوو کسانو شمېر ۴۷۶۰۶ ته ورسېد.

د عامې روغتيا وزارت د خبرپاڼې له مخې، په تېرو ٢٤ ساعتونو کې د کرونا ويروس له امله یو کسان مړ شوی چې په دې سره له دې ناروغۍ د ټولو مړه شوو کسانو شمېر ۲۴۰۰ ته ورسېد.

کرونا ويروس څه باندې يو کال وړاندې په چين هېواد کې خپور شو چې بيا يې د افغانستان په ګډون لږ تر لږه د نړۍ ټولو هېوادونو ته سرايت وکړ، خو په دې وروستيو کې د کرونا نوې بڼه بيا په امريکا او برېتانيا کې ليدل شوې ده.

د کرونا ويروس د نوې بڼې له پيدا کېدو سره سم يو شمېر هېوادونو خپل سرحدونه بيا له سره تړلي دي او د افغانستان د عامې روغتيا وزارت هم له خلکو غوښتنه کړې چې نورو هېوادونو ته خپل سفرونه کم کړي.