کابل کې په دوو چاودنو کې یو کس وژل شوی او درې نور ټپیان دي

لومړی تعقیب- کابل (پژواک، ۱١ سلواغه ۹۹): د کابل پولیس وایي، د دغه ښار په څلورمه او پنځمه ناحیو کې په دوو جلا چاودنو کې یو کس وژل شوی او درې نور ټپیان شوي دي.

د کابل امنیې قوماندانۍ ویاند فردوس فرامرز د دغو چاودنو د تایید ترڅنګ وویل چې نن سهار شاوخوا اته بجې او پنځوس دقیقې د پنځمی ناحیې اړوند د کمپنۍ پله سیمه کې پر یوه رينجر موټر د چسپکي ماین چاودنه شوې خو مرګ ژوبله نه لري.

دغه راز هغه وویل چې دویمه چاودنه هم نن سهار نهه بجې او ۴۰ دقیقې د څلورمې ناحیې اړوند سلیم کاروان په ساحه کې وشوه.

هغه زیاته کړه چې په یاده ساحه کې پر یوه کرولا موټر د چسپکې ماین چاودنه شوې چې له امله یو ملکي کس وژل شوی او درې نور ټپیان شوي دي.

هغه وویل چې د پېښی ټپیان روغتون ته لېږدول شوي او په اړه یې د ګډو ځواکونو څېړنې روانې دي.

د یادو چاودنو مسوولیت تر اوسه چا نه دی منلی.

دا په داسی حال کې ده چې په دې وروستیو کې د کابل په بېلابېلو ناحیو کې د چسپکي ماینونو چاودنی ډېرې شوې چې ډېرو خلکو ته په کې مرګ ژوبله اوښتې ده.

Views: 36