جلال اباد (پژواک، ۲۴ سلواغه ۹۹): د ننګرهار والي وایي، د دغه ولایت په خوږیاڼو او شېرزادو ولسوالیو کې ۳۷ وسله والو طالبان وژل شوي، خو طالبان دعوه کوي چې په شېرزادو کې شل دولتي سرتېري وژل شوي دي.
د ننګرهار والي ضياءالحق امرخېل وايي، د خوږياڼو ولسوالۍ په زاوې سيمه کې له تېرې شپې راهيسې د دولتي ځواکونو هوايي بريدونو او کمينونو په پايله کې ۳۱ وسله وال طالبان وژل شوي او مړي یې په سيمه کې پاتې دي.
د خوږياڼو ولسوال محمد ايوب بهار هم پژواک ته وويل چې امنيتي ځواکونه اوس په سيمه کې د وسله والو طالبانو د مړو په راټولولو بوخت دي.
دغه راز امرخېل وایي چې د شېرزاد ولسوالۍ اړوند سیمو کې هم شپږ وسله وال طالبان وژل شوي دي.
خو د طالبانو وياند ذبيح الله مجاهد بيا په شېرزادو کې د شلو دولتي ځواکونو وژل کېدو ادعا کوي.
مجاهد پر خپله ټويټرپاڼه ليکلي چې طالبانو د شېرزادو ولسوالۍ په کندۍ سیمه کې د دولتي ځواکونو په عملیاتي قوه بریدونو کړي او په ترڅ کې یې له یادو ځواکونو شل کسان وژل شوي او يو شمېر ټپيان دي.
خو د ننګرهار ولایت د رسنيو دفتر په شېرزادو کې د دولتي سرتېرو مرګ ژوبله ردوي.
Views: 88
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن