جلال اباد (پژواک، ۱۲ کب ۹۹): په ننګرهار کې د انعکاس خصوصي تلوېزيون د دوبلې برخې درې ښځينه کارکوونکې په دوو وسله والو بريدونو کې ووژل شوې.
د معلوماتو له مخې، يادې کارکوونکې له کارځای څخه کور ته روانې وې چې بريدونه پرې وشول.
د انعکاس خصوصي تلوېزيون خبريال جاوېد رازمند د کب په ١٢مه، پژواک اژانس ته ومنله چې د دوی د دوبلې د برخې درې همکارانې په جلال اباد ښار کې په دوو بريدونو کې وژل شوې دي.
د ننګرهار ولايت يوې باوري سرچينې د نوم نه خپرولو په شرط پژواک اژانس ته وويل چې لومړی بريد نن مازيګر د څلورو بجو په شاوخوا کې د جلال اباد ښار څلورمې ناحيې اړوند قصبې سيمه کې شوى دى.
هغه زياته کړه، د انعکاس تلوېزيون د دوبلې برخې همکاره مرسل په دغه بريد کې وژل شوې ده.
د سرچينې د معلوماتو له مخې، بله پېښه هم تر څلور بجو وروسته د ښار د لومړۍ ناحيې اړوند د بنګړيوالانو کوڅې سيمه کې شوې چې د انعکاس تلوېزيون د دوبلې برخې دوه نورې همکارانې په کې وژل شوي او يوه لاروۍ ښځه ټپي شوې ده.
د جلال اباد حوزوي روغتون وياند ګلزاده سنګر هم تاييد کړه چې درې جسدونه او يوه ټپي چې ټولې ښځې دي ور وړل شوي دي.
د پېښې مسوليت چا نه دی منلی.
د يادونې ده چې څو مياشتې مخکې هم په جلال اباد ښار کې د دې تلوېزيون کارکوونکې ملالۍ ميوند په يوه بريد کې وژل شوې وه.
په دې وروستيو کې په کابل، ننګرهار او نورو ولايتونو کې پر خبريالانو او د رسنيو پر کارکوونکو بريدونه زيات شوي دي.
Views: 423
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن