کونړ کې درې تنه په ډزو ووژل شول

اسعد اباد (پژواک ۱۲ کب ۹۹): د کونړ امنیتي مسوولین وايي چې د دې ولايت په سرکاڼو ولسوالۍ کې ناپېژاندو وسله والو درې تنه وژلي دي.

د امنیه قومندانۍ مطبوعاتي مسوول فریدالله دهقان، پژواک اژانس ته وویل چې نن له غرمې وروسته د سرکاڼو په بهراباد سیمه کې درې تنه چې په سراچه موټر کې سپاره وو، د ناپېژاندو وسله والو له خوا په ډزو وژل شوي دي.

ده زياته کړه، وژل شوي کسان ولسي خلک دي. پولیس سيمې ته ورغلي او پلټنې يې پيل کړې دي، ترڅو قاتلين ونیسي.

د يادولو ده چې دوه اونۍ مخکې هم په همدغه سيمه کې يو ولسي وګړی او دوه پوليس د ځای پرځای شويو چاودېدونکو توکو له امله وژل شوي وو.