کندهار (پژواک، ۱۶ کب ۹۹): د کندهار امنیه قومانداني وايي، هغه وسله وال بریدګر یې نیولی چې څو اوونۍ وړاندې یې په کندهار ښار کې دوه دیني عالمان په جلا جلا هدفي بریدونو کې وژلي وو.
د کندهار د امنیې قوماندانۍ ویاند جمال ناصر بارکزي پژواک خبري اژانس ته وویل، دغه بریدګر د کندهار ښار د ۹مې امنیتي حوزې د پولیسو له خوا نیول شوی دی.
د عبدالوهاب په نوم نیول شوي تن چې اوسمهال د کندهار ښار په نهمه ناحیه کې اوسېږي او په اصل کې د غزني ولایت د اجرستان ولسوالۍ اوسېدونکی دی، په خپل جرم اعتراف کړی دی.
نوموړی وايي، د خپلو دوو ملګرو (جانان اغا او مولوي نور محمد) په ملتیا یې د (ساقي) په مشرۍ په کندهار ښار کې هدفي وژنې کولې.
هغه زیاتوي: ((یو زه وم، بل ساقي و، د ښار په نهمه ناحیه کې مو مولوي عبدالباقي د کور په دروازه کې ترور کړ، دوی ویل دا د حکومت ملا دی، بیا مو مولوي عبدالباري ترور کړ چې په یوه مدرسه کې یې کوچنیانو ته درس هم وایه، دوی ویل دا هم د حکومت ملا دی.))
د ده په خبره، تر دغو پېښو وروسته د پولیسو له خوا ونیول شو.
مولوي عبدالباري چې دینې مدرسه یې هم لرله د سلواغې په ۱۲مه په خپل کور کې او مولوي عبدالباقي د همدې میاشتې په ۱۵مه د خپل کور په دروازه کې وژل شوی و.
دواړې پېښې د کندهار ښار په ۹مه ناحیه کې شوې وې چې د چارواکو په وینا، د نیول شوي تن نور ملګري د پولیسو تر تعقیب لاندې دي.
تر اوسه په دې اړه وسله والو طالبانو څه نه دي ویلي.
Views: 368
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن