لښکرګاه (پژواک، د وري لومړۍ نېټه ١٤٠٠): د هلمند امنيتي مسوولين وايي چې ناپېژاندو وسله والو په نهر سراج ولسوالۍ کې يو ديني عالم وژلى دى.
په هلمند کې يوې باوري امنيتي سرچينې د وري په لومړۍ نېټه پژواک خبري اژانس ته وويل چې تېر شپه ناپېژاندو وسله والو په نهرسراج ولسوالۍ پر يوه ديني عالم ډزې کړې دي.
هغه وايي: ((دغه ديني عالم اول ټپي و خو وروسته یې په روغتون کې ساه ورکړه.))
دغه راز د نهر سراج ولسوالۍ امنيه قوماندان محمد اسماعيل خپلواک هم ياده پېښه تاييد کړه او ويې ويل چې دغه ديني عالم مولوي محمد نوميده او د يوه جومات امام و.
ده وويل چې د يادې پېښې په تړاو تر اوسه څوک نه دي نيول شوي خو په اړه يې پلټنې روانې دي.
د دې پېښې مسووليت تر اوسه چا نه دى منلى.
د يادونې ده، په دې وروستيو کې د پلازمېنې کابل ترڅنګ په ټول هېواد کې هدفي وژنې ډېرې شوې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن