کابل (پژواک، ٦ ورى ١٤٠٠) : د امریکا ولسمشر جوبایډن وايي چې په ټاکلې نېټه له افغانستانه د ځواکونو ايستل ستونزمن دي، خو فکر نه کوي چې دوى هلته د اوږدې مودې لپاره پاتې شي.
بايډن واک ته تر رسېدو وروسته په سپينې ماڼۍ کې په خپلې لومړۍ خبري غونډه کې وويل، چې د «تکتیکي ستونزو» له پلوه مشکله ده چې د مې تر لومړۍ نېټې له افغانستان څخه ځواکونه وایستلی شي.
د امريکا او طالبانو ترمنځ د دوحې تړون له مخې، ټول بهرني ځواکونه بايد له افغانستانه د ٢٠٢١ زېږديز کال د مې تر لومړۍ نېټې پورې ووځي.
خو د امريکا ولسمشر وويل : «موږ به (له افغانستان څخه) ووځو، خو پوښتنه داده چې کله،؟))
جوبايډن وویل چې په دې هکله له خپلو شریکانو د ناټو غړو هېوادونو سره د وتلو په لوجستیکي مسایلو مشورې کوي او د امریکا د بهرنیو چارو وزیر انتوني بلینکن په بروکسل کې د امریکا له متحدینو سره چې په افغانستان کې ځواکونه لري، خبرې کړې دي.
ده زياته کړې : «که له هغه ځایه ووځو په مصونه او منظمه توګه باید ووځو.))
د بایډن په وينا، په دې هکله له متحدینو او شریکانو سره مشورې روانې دي چې څنګه دغه کار پلی شي.
د امریکا ولسمشر دغه راز ويلي چې د ملګرو ملتونو په مشرۍ پروسه هم ژر پیلیږي چې د افغانستان د جګړې د پای ته رسېدو څرنګوالی څرکند شي.
د نوموړي په وينا، د امریکا او طالبانو د موافقې په اړه چې د ټرمپ د ادارې پر وخت شوې، ارزونې هم روانې دي.
دغه راز د طالبانو ډلې خبرداری ورکړی چې که تر ټاکلې مودې پورې امریکایي ځواکونه ونه وځي مسوولیت به یې د امریکا پر غاړه وي.
دا په داسې حال کې ده چې د امریکا د کانګرس یو شمېر غړي هم له افغانستان څخه د امریکایي ځواکونو سمدستي ایستل نه غواړي.
Views: 108
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن