هرات ښار (پژواک، ۱۶ وری ۱۴۰۰): سرچینو پژواک ته ویلي چې د هرات په شینډنډ ولسوالۍ کې د طالبانو په ډله ییزو بریدونو کې د ملي اردو اته سرتېري وژل شوي دي.
په هرات کې یوې باوري سرچینې پژواک ته وویل، تېره شپه طالبانو د شینډنډ ولسوالۍ په جوغازي سیمه کې د ملي اردو پر پوسته ډله ییز برید کړی دی.
د سرچینې په خبره، دې نښتې درې ساعته دوام درلود چې له امله یې د ملي اردو اته سرتېري وژل شوي او اووه نور طالبانو ژوندي نیولي دي.
سرچینې زیاته کړه، نیول شوي اووه سرتېري په سیمه کې د افغان ځواکونو له هوايي بریدونو وروسته له طالبانو تښتېدلي دي.
سرچینې روښانه کړه، په دې نښته کې درې نجونې هم ټپیانې شوې چې د درملنې لپاره د هرات حوزوي روغتون ته انتقال شوې دي.
سرچینې وویل، د ملي اردو دغه پوسته تازه په یاده سیمه کې جوړه شوې وه.
د هرات والي سید عبدالوحید قتالي په شینډنډ ولسوالۍ کې د طالبانو د تېرې شپې برید تایید کړ خو په دې اړه یې جزئیات وړاندې نه کړل.
د هرات شینډنډ ولسوالۍ اوسېدونکي په دې ولسوالۍ کې د طالبانو بریدونو پر ډېرېدو اندېښنه څرګندوي او وايي، هره شپه په شینډنډ ولسوالۍ کې جګړه ده او ډېری وخت په کې ملکي وګړو ته زیان رسېږي.
د سیمې یاد اوسېدونکي ادعا کوي چې ان ډېری ورځې خلک د ناامنۍ له ډاره کار او ژوند نه شي کولای.
دوی له دولته غواړي چې د پراخو عملیاتو په ترسره کولو سره وضعیت ښه کړي.
طالبانو تر اوسه د شینډنډ د جګړې په اړه څه نه دي ویلي.
د یادونې ده، دوه شپې مخکې طالبانو د شینډنډ ولسوالۍ ملي امنیت پر مدیریت موټربم برید وکړ چې له امله یې د ملي امنیت څلور منسوبین ووژل شول.
Views: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن