د کوېټې سرينا هوټل کې چاودنې نږدې شلو کسانو ته مرګ ژوبله اړولې ده

کابل (پژواک، ٢ غويى ١٤٠٠): د سوېلي پښتونخوا بلوچستان ايالت د مرکز کوېټې ښار په سرينا هوټل کې د چاودنې له امله نږدې ٢٠ کسانو ته مرګ ژوبله اوښتې ده.

دا چاودنه پرون ماخوستن د یاد هوټل د موټرو په تم ځاى کې هغه مهال وشوه چې په دغه هوټل کې يو شمېر لوړپوړي ملکي او پوځي مسوولين هم مېشت وو.

د کوېټې پوليسو يوه مشر سيد عطاءالله ويلي، يو موتر چې څنګه د هوټل د موټرو تم ځاى ته رسېدلى بيا يې چاودنه کړې ده.

د هغه په وينا، په دې چاودنه کې پنځه کسان وژل شوي او ١٢ نور ټپيان دي.

بلخوا ځينو سرچينو ويلي چې د چاودنې پر مهال په هوټل کې د چين د سفير په ګډون چينايي پلاوى هم و او ښايي د بريد هدف هم هغوی وو.

خو د بلوچستان د کورنيو چارو وزير مير ضياءالله ويلي چې د چين سفير د کوېټې په خوندي سيمه کې و.

هغه زياته کړې چې نوموړى به په عادي توګه نن هم خپل کارونه ترسره کړي.

د پاکستان تحريک طالبان ډلې د دې چاودنې مسووليت پر غاړه اخيستى دی.

د دې ډلې وياند محمد خراساني ويلي چې دا يو ځانمرګى بريد و چې له امله يې ګڼ شمېر کسانو ته مرګ ژوبله اوښتې ده.