د امريکا مشرانو جرګه له خليلزاد څخه د افغان ښځو د حقونو په اړه پوښتنې کوي

کابل (پژواک، ٧ غويى ١٤٠٠) : د امريکا د مشرانو جرګې د بهرنیو اړیکو کمېټه زلمی خلیلزاد را غواړي څو د امریکايي‌ عسکرو له وتلو وروسته د افغان ښځو د حقونو د خوندیتوب په اړه د امریکا د نوي حکومت د پلانونو په اړه ترې وپوښتي او ډاډ ترلاسه کړي.

د امريکا غږ د راپور له مخې، زلمى خليلزاد به نن دغويي په ٧مه، د يادو موضوعاتو په اړه د سناتورانو پوښتنو ته ځوابونه ووايي.

د امريکا د مشرانو جرګې يا سنا د دغې کمېټې ځینې غړي‌ اندېښنه لري‌ چې د امریکایي ځواکونو له وتلو وروسته به وسله وال طالبان واک ترلاسه کړي او د ښځو حقونه به خوندي‌ نه وي.

د دغې کمېټې یوې غړې جیني‌ شاهین ويلي، چې خلیلزاد د ښځو د مشارکت په اړه کافي هڅه نه ده کړې.

نوموړې زياته کړې، د سپتمبر په یوولسمه له افغانستان څخه د امریکايي ځواکونو له وتلو وروسته پلانونو کې د افغان ښځو د حقونو د خوندیتوب په اړه ډېر شکونه او بې باوري موجوده ده.

هغې ويلي : « دوی لږ تر لږه دا یوه مسئله ګڼي چې یو ښه پيل دی. زه فکر کوم چې زموږ لپاره ډېر مهم دي څومره مو چې وس کېږي په دې اړه به کار وکړو. په هر مجلس کې د ښځو د حقونو په مسئلې بحث کیږي.»

د سنا د بهرنیو اړیکو د کمېټې مشر باب مېنېندېز تېره اوونۍ له یوې محرمې غونډې وروسته ويلي و، چې د افغان ښځو او لږکيو د حقونو په اړه اندېښنې لري.

په همدې حال کې د جمهوریت غوښتونکو استازی لېندسي ګراهام په دې باور دی چې طالبان به بیا ښوونځي‌ وتړي او په ښځو باندې به قوي محدودیتونه ولګوي.