جلال اباد (پژواک ۲۲ غبرګولی ۱۴۰۰): د ننګرهار ولايت بهسودو ولسوالۍ مربوطاتو کې د کابل او کونړ په ګډ سيند کې يوه کښتۍ ډوبه شوې چې ۷ کسان په کې مړه شوي دي.
د ننګرهار د والي وياند عطاء الله خوږياڼي د غبرګولي په ۲۲مه پژواک اژانس ته وويل چې دغه پېښه نن سهار شاوخوا لس بجې د بهسودو ولسوالۍ اړوند ګردي کڅ سيمه کې رامنځته شوې ده.
دی وايي تر مازيګر ناوخت يوازې يو جسد پيدا شوی و، د يوې ښځې په ګډون اته کسان نادرکه دي او يو ماشوم ژوندی ژغورل شوی دی.
خو د کامې ولسوالۍ يو اوسیدونکی الهام یاسیني، وايي ټول اووه کسان مړه شوي دي.
د هغه په وينا په مړو شويو کسانو کې دوه ماشومان او يو نارينه د کامې ولسوالۍ دي، يوه ښځه او نارينه د ګوشتې ولسوالۍ دي او دوه نور کسان د بهسودو ولسوالۍ دي.
د بهسودو ولسوالۍ يو مدني فعال رييس خان غرني هم ويلي چې دغه پېښه کې د ښځو او ماشومانو په ګډون شاخوا لس کسانو ته مرګ ژوبله اوښتې ده.
Views: 24
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن