اسټن: له افغان امنیتي ځواکونو سره د همکاریو نوی فصل پرانیستل شوی

کابل (پژواک، ۵ چنګاښ ۱۴۰۰) : د امریکا د دفاع وزیر لویډ اسټن ویلي چې دوی به له افغان حکومت او افغان ملي ځواکونو سره همکار پاتې شي او د ګډ هدف لپاره به په ګډه کار کوي.

ولسمشر اشرف غني او ډاکټر عبدالله عبدالله له افغان پلاوي سره امریکا ته د خپل سفر په دویمه ورځ پرون په واشنګټن کې د دغه هېواد دفاع وزارت ته ولاړل او هلته یې د دفاع له وزیر لویډ اسټن سره ولیدل.

د امریکا دفاع وزیر په دغې لیدنه کې وویل چې هېواد یې د افغانستان د ملي دفاعي ځواکونو پر جوړښت مهمه پانګونه کړې څو په دغه هېواد کې سوله او ثبات رامنځته شي.

هغه یو ځل بیا ژمنه وکړه، چې د امریکا او افغانستان ترمنځ به په دفاعي برخو کې ملګرتیا ادامه ومومي.

اسټن چې پخوانی پوځي جنرال هم پاتې شوی، په دغې لیدنه کې د افغان او امریکایي ځواکونو د قربانیو ستاینه کړې او ویلي یې دي چې ده د افغانستان د ملي ځواکونو د لومړۍ لواء تر رامنځته کېدو وروسته ورسره لیدنه کړې وه.

د امریکا دفاع وزیر وویل چې امریکا به له افغان امنیتي ځواکونو سره هر ډول امنیتي همکاریو ته ادامه ورکړي او له افغان امنیتي او دفاعي ځواکونو سره د همکاریو نوی فصل پرانیستل شوی دی.

ده زیاته کړې : "موږ به له افغان حکومت او افغان ملي ځواکونو سره همکار پاتې شو او د ګډ هدف لپاره به په ګډه کار کوو. "

ولسمشر اشرف غني په دې لیدنه کې د هغو امریکایي سرتېرو د قربانیو ستاینه کړې چې په افغانستان کې وژل شوي دي.

هغه په تېر اپریل میاشت کې د امریکا د ولسمشر جوبایډن پرېکړه چې له افغانستان څخه به تر سپټمبر میاشتې پورې خپل سرتېري باسي، وستایله او ویې ویل چې دغه  کار له جګړې څخه سولې ته زمینه برابره کړه.