کابل (پژواک، ۲۶ چنګاښ ۱۴۰۰): د قطر په منځګړتوب د افغان دولت او طالبانو د ځانګړو پلاوو ترمنځ د سولې خبرې اترې په دوحه کې پیل شوې.
په دې خبرو کې د ګډون په موخه د ډاکتر عبدالله عبدالله په مشرۍ د افغانستان د اسلامي جمهوري دولت یو پلاوی پرون مازدیګر ناوخته دوحې ته رسېدلی دی.
د افغانستان د ملي روغې جوړې عالي شورا ویاند فریدون خوځون د چنګاښ په ۲۶مه پژواک خبري اژانس ته وویل چې دولتي پلاوی د سولې په نیت راغلی او هیله من دی چې ښې لاسته راوړنې به ولري.
هغه زیاته کړه: "سوله یواځې د خبرو او مذاکراتو له لارې ممکنه ده، افغانان سولې ته اړتیا لري، نور له جګړو ستړي شوي دي."
خوځون وایي چې په دې ناسته کې به د قطر د بهرنیو چارو وزارت ځانګړی استازی ډاکتر مطلق بن ماجد الحقطاني هم شتون ولري.
نوموړي وویل چې دوحې ته له رسېدو سره سم د ډاکتر عبدالله عبدالله په مشرۍ پلاوي د امریکا له ځانګړي استازي ډاکتر زلمي خلیلزاد او د افغان دولت له مذاکراتي ټېم سره سره جلا جلا وکتل.
خو خوځون د دې لیدنو جزئیات په ډاګه نه کړل.
د ملي روغې جوړې عالي شورا ريیس عبدالله عبدالله پرون دوحې ته له روانېدو مخکې په هوایي ډګر کې خبریالانو ته وویل چې دوی به د افغانستان اسلامي جمهوریت استازیتوب کوي.
هغه زیاته کړه: "۴۲ کاله کېږي چې زموږ په هېواد کې جنګ روان دی او په سلګونو زره خلک په کې قربان شوي دي، باید د سولې ټینګېدو لپاره خپلې هڅې وکړو، دا هڅې د افغانستان د خلکو او د هغوی د مشروع غوښتنو په استازیتوب کوو؛ هیله ده چې د طالبانو تحریک به هم دا یو فرصت وګڼي او پر دې باید هم پوه شي چې د جګړې دوام او یا هم د یوې ولسوالۍ نیول او یا د سیمو د نیولو نتیجه په هېواد کې سوله نه شي راوستلای. "
