د احصایې اداره: شپږ میلیونه برېښنایي تذکرې وېشل شوې او د اتو میلیونوغوښتنه شوې

کابل (پژواک، ۳ زمری ۱۴۰۰): د احصایې او معلوماتو ملي اداره وایي چې تر اوسه شپږ میلیونه برېښنایي تذکرې وېشل شوې او اته میلیونه نورو کسانو غوښتنلیکونه ورکړي دي.

له ارګ څخه د زمري په ۳مه، پژواک ته په رااستول شوې خبرپاڼه کې راغلي چې د ولسمشر محمد اشرف غني د احصایې او معلوماتو ملي ادارې له مسوولینو سره په غونډه کې د تخنیکي ټیم، سیستمونو جوړولو، انکشاف او برېښنایي تذکرو د وېش په اړه د دوی د کړنو راپور واورېد.

سرچینې زیاته کړې، د احصایې او معلوماتو ملي ادارې رییس جاوید رسولي وویل، نړیوالو معیارونو ته په پام سره یې په وزارتونو او ادارو کې د سیستمونو د لا انکشاف او د کارونو د ښه والي په موخه ظرفیتونه روزل شوي دي.

نوموړي د سیستمونو د تطبیق، خالي والي، له انکشاف او د ادارو د رهبرۍ له بدلون وروسته د لومړیتوبونو د بدلون، د فعالیتونو او خدماتو وړاندې کولو د تکرار او ځینې نورې اړوندې ستونزې له ولسمشر سره شریکې کړې.

ده وویل، د بشري ځواک د زیاتوالي لپاره یې د کادري سیستم د طرحې برابرولو ترڅنګ نږدې شپږ میلیونه برېښنایي تذکرې وېشلي او د اتو میلیونه تذکرو د وېش غوښتنه شوې ده.

په خبرپاڼه کې راغلي، ولسمشرغني د معلوماتو او مرکزي احصایې ادارې مسوولینو څخه د ظرفیت ایجاد، سیستمونو جوړولو او شپږ میلیونه تذکرو د وېش مننه وکړه او د دغه بهیر په لاچټکولو ټینګار وکړ.

هغه زیاته کړه، د ستونزو د حل او د چارو د لا چټکتیا په موخه دې په هېواد کې له شته ظرفیتونو څخه استفاده وشي.

ولسمشر څرګنده کړه، د افغانستان بانک ډیجیټلي شوی، کورنیو چارو، ملي دفاع، پوهنې، عامې روغتیا، کلیو پراختیا او فواید عامې وزارتونه د دغې پروسې په لومړیتوبونو کې دي. د مالیې وزارت د خزاینو سیستم، بوديجه او د معاشونو ورکړه باید مطلق ډیجیټلي شي.

غني د چارو ادارې عمومي رئیس او د احصایې او معلوماتو ملي ادارې رییس ته د چارو د تکرار د مخنیوي په موخه کابینې ته د وړاندیزونو برابرولو او د مختلفو سیستمونو پر ځای د واحد دولتي سیستم رامنځته کولو او انکشاف لارښوونه وکړه.

هغه وویل، د افغانستان د ډیجیټلي کېدو په صورت کې به راکړې ورکړې اسانه، خدمات او د زېربنایي پروژو او چارو مدیریت په مراتبو اغېزناک شي.

ولسمشر د خپلو خبرو په پای کې د معلوماتو او مرکزي احصایې مسوولینو ته په خطاب کې وویل: "په تاسو ټولو پانګونه کېږي، په ډېر اعتماد کار وکړئ، شبکې مو پراخه کړئ، ځکه کار به مو هغه وخت لا ډېر اغېزناک وي چې ټولو ادارو ته وغځېږي."