کابل (پژواک، ۲۲ تله ۱۴۰۰): د افغانستان بانک یوه سرچینه وايي چې د دغه بانک د مخکني سرپرست اجمل احمدي ۶،۵ میلیون افغانۍ کنګل شوې دي.
اجمل احمدي مخکني ولسمشر محمد اشرف غني ته نږدې کس و چې د جمهوریت له ولسي جرګې یې د باور رایې نه اخیستلو په صورت کې هم د افغانستان بانک د سرپرست په توګه دنده ترسره کوله.
د افغانستان بانک یوه سرچینه چې نه غواړي نوم یې خپور شي، پژواک خبري اژانس ته وویل چې ددغه بانک مسوولينو د بانک د پخواني سرپرست اجمل احمدي د معاش له مدرکه شاوخوا شپږ میلیونه او ۵۰۰ زره افغانۍ کنګل کړې دي.
دا په داسې حال کې ده چې دوه میاشتې وړاندې طالبانو کابل ونیوه او څو ورځې وروسته یې خپله یوه سرپرسته کابینه اعلان کړه او د افغانستان بانک نویو مسوولینو د مخکني حکومت د پخوانیو لوړ پوړو چارواکو د حسابونو تړلو یو مکتوب هم صادر کړ.
د سرچینې په وینا، د احمدي پیسې هم ښايي د یاد مکتوب پر اساس بندې شوې وي.
پژواک دغه موضوع د اطلاعات او فرهنګ وزارت د نشراتي مرستیال ذبیح الله مجاهد له سکرټر بلال کریمي سره هم شریکه کړه خو تر اوسه يې ځواب نه دى ورکړى.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن