جلال اباد (پژواک، ۲۶ تله ۱۴۰۰): د ننګرهار ولايت په مرکز جلال اباد ښار کې د طالبانو پر رېنجر موټر چاودنه شوې چې دوه ملکي وګړي يې له امله ټپيان شوي دي.
روغتيايي چارواکي وايي چې د ټپيانو روغتيايي حالت د ډاډ وړ دی.
د جلال اباد ښار د پنځمې ناحيې اړوند د کابل اډې سيمې يو اوسېدونکي اتل خان پژواک اژانس ته وویل چې چاودنه نن يوه بجه او ۲۵ دقيقې په دې سيمه کې پر يوه رېنجر موټر شوې ده.
هغه زياته کړه، رېنجر يو څه تخريب شوی خو طالبانو ته په کې مرګ ژوبله نه ده اوښتې.
خو دی وايي چې په ياده چاودنه کې دوه ملکي کسان ټپيان شوي دي.
دغه راز د ننګرهار يوه روغتيايي چارواکي هم د نوم نه خپرولو په شرط پژواک ته تاييد کړه چې د پېښې له ځايه دوه ټپيان روغتون ته انتقال شوي دي.
د سرچينې په وينا، د ټپيانو روغتيايي وضعيت د ډاډ وړ دی.
حکومتي مسوولينو په دې تړاو تر اوسه څه نه دي ويلي.
همدرانګه د يادې چاودنې مسووليت هم تر اوسه کومې وسله والې ډلې نه دى منلى.
Views: 1185
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن