کابل(پژواک،۲۸ تله ۱۴۰۰):د کرکټ شل اووریز نړیوال جام په درشل کې نن څلور تمریناتي او دوه رسمي لوبې کېږي.
د کرکټ د نړيوالې شورا له خوا د خپرې شوې خبرپاڼې له مخې، د رسمي لوبو په لړ کې به نن ماسپښین ۲:۳۰ بجې د کواليفای راونډ له لومړي ګروپ څخه نیمبیا د نيدرلېنډ پر وړاندې ولوبېږي.
دغه راز ماښام ۶:۳۰ بجې به له همدغه لومړي ګروپ څخه سریلانکا د ایرلېنډ خلاف میدان ته کښته شي.
د تمریناتو لوبو په لړ کې به نن ماسپښین ۲:۳۰ بجې هندوستان له اسټرالیا او نیوزیلېنډ له انګلستان سره ولوبېږي.
له دې مخکې هند او او اسټرالیا خپلې لومړۍ تمریناتي لوبې ګټلي، خو انګلستان او نيوزیلېنډ بایللي دي.
د تمريناتي لوبو په دوام به نن ماښام ۶:۳۰ بجې افغانستان له ویسټ انډیز او سوېلي افریقا له پاکستان سره ولوبېږي.
سوېلي افریقا او پاکستان خپلې لومړۍ تمریناتي لوبې ګټلي خو افغانستان او ویسټ انډیز بایللي دي.
