مزارشریف (پژواک، ۲ لړم ۱۴۰۰): په بلخ کې سیمه ییز چارواکي وایي چې د مزار قول اردو له تعلیمي مرکز څخه ۴۰۰ سرتېري له یوې میاشتنۍ نظامي زده کړو وروسته فارغ شول.
د بلخ د اطلاعاتو او فرهنګ ریاست په همدې تړاو خپرو شوو معلوماتو کې ویلي چې د فراغت په دغو مراسمو کې د شمال زون لوړ رتبه ملکي او نظامي چارواکو ګډون کړی و.
د اطلاعاتو او فرهنګ رياست په خبرپاڼه کې ویل شوي چې د ځواکونو د فراغت په دغو مراسمو کې د بلخ والي مولوي قدرت الله ابو حمزه ويلي د یوه هېواد د امنیت او ملي نوامیسو د ساتنې لپاره د منظم جګړه ییز ځواک درلودل اړین دي.
د بلخ والي همدا راز له تازه فارغ شویو ځواکونو څخه غوښتنه کړې چې د ولس د ارامۍ او سوکالۍ لپاره دې شپه او ورځ هلې ځلې وکړي.
په خبرپاڼه کې ویل شوي چې په شمال کې د ارشاد او دعوت مسوول مولوي عبدالقدیر له فارغ شوو ځواکونو غوښتنه کړې چې د افغانستان د امنیت او آرامۍ د دښمنانو پر وړاندې له ټینګ او قاطعانه عزم څخه کار واخلي.
په خبرپاڼه کې راغلي چې د مراسمو په پای کې تازه فارغ شوو ځوانانو ته د بلخ ولایت والي او قول اردو قوماندان له خوا ستاینلیکونه ورکړل شول.
Views: 182
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن